Haruna Niyonzima wa Yanga mwenye mpira akijaribu kumtoka Nassoro Cholo wa Simba wakati wa mpambano wao jumapili iliyopita.
Kutangulia
sio kufika.
· Simba yatoka nyuma na kusawazisha.
· Yanga yashindwa kulinda mabao yake
uwanja wa taifa.
· Mamilioni ya shilingi yapatikana
kutokana na viingilio.
Na. Mwandishi wetu.
Ule usemi usemao kutangulia si kufika umedhihirika jumapili
iliyopita, wakati watani wa jadi katika soka la Tanzania, Simba na Yanga
walipokuwa wakipepetana katika moja ya mechi ya harakati za kuwania ubingwa wa
ligi kuu soka ya Vodacom Tanzania bara.
Kudhihirika kwa usemi huo, kunafuatia timu ya Yanga
iliyokuwa mbele kwa magoli 3 – 0 dhidi ya Simba, iliyoyapata katika kipindi cha
kwanza, kushindwa kuyalinda na hatimaye Simba kusawazisha mabao hayo, katika
mchezo wa ligi kuu ya soka ya Vodacom uliopigwa kwenye uwanja wa taifa jijini
Dare es salaam, jumapili iliyopita.
Alikuwa ni mchezaji Mrisho Khalfan Ngassa, aliyewainua
wapenzi na mashabiki wa timu yake kwa kuandika bao la kwanza, huku mchezaji
Hamis Kiiza akipachika bao la pili na la tatu na hivyo kuifanya timu yake
kwenda mapumziko huku ikiwa mbele kwa mabao hayo 3 – 0 dhidi yawekundu wa
Msimbazi Simba.
Kwenye kipindi cha pili Simba walichachamaa na kuweza
kuutawala mchezo huo katika kipindi hicho na hatimaye kuweza kupata mabao hayo
ya kusawazissha yaliyoamsha hoi hoi na ndelemo kwa wapenzi na mashabiki wa timu
hiyo.
Mchezaji Bitlam Mombeki wa Simba aliipatia bao la kwanza timu
yake naye mganda Joseph Owino akiifungia Simba bao la pili wakati bao la tatu
la Simba likpachikwa wavuni na Gilbert Kaze.
Jumla ya shilingi 500,727,000 zimepatikana kutokakana na
viingilio vya mlangoni katika mchezo huo uliopigwa jumapili iliyopita.
Kwa matokeo hayo sasa Simba wanashikilia nafasi ya tatu
kwenye msimamo wa ligi kuu hiyo kwa kuwa na pointi 19 kibindoni wakati Yanga
wao wakiwa na pointi 16 na hivyo kushikilia nafasi ya Nne.
Azam FC ndiyo iko kileleni mwa ligi hiyo kwa kuwa na pointi
20 ikifuatiwa na Mbeya City inayoshikilia nafasi ya pili kwenye msimamo wa ligi
hiyo.
