Luis Suarez awataka Liverpool wamuache aende zake.
· Asema ni wakati wake wa kuondoka
· Wenger ajiandaa kumsainisha, Liverpool bado watia ngumu
Na. deo kaji makomba
Hatimaye mshambuliaji wa klabu ya
soka ya Liverpool ya England, Luis Suarez, ameweka hadhari nia yake ya kutaka
kuondoka katika klabu hiyo na kujiunga na klabu iliyo katika mashindano ligi ya
mabingwa barani ulaya.
Hatua ya Suarez kuweka hadharani nia
hiyo ya kutaka “kuwatema” majogoo hao wa Anfiled, imekuja ikiwa hajaambatana na
timu yake ambayo hivi sasa iko katika ziara ya kimechezo ya kimataifa huko
nchini Norway kutokana na mchezaji huyo kuwa majeruhi, ikiwa ni mandalizi ya
hekaheka za ligi kuu ya soka ya England inayotarajiwa kuanza hivi karibuni.
Mshambuliaji huyo wa kimataifa wa
Uruguay, mwenye umri wa miaka 26, anatarajia kuwasilisha maombi ya uhamisho kwa
uongozi wa Liverpool mwishoni mwa wiki, endapo kama mchakato wake wa kutaka
kuondoka ndani ya Liverpool utakuwa bado umetiwa ngumu na klabu hiyo yenye
masikani yake huko Anfeld.
Suarez ameyaeleza magazeti ya the
Guardian na Daily Telegraph ya Uingereza ya kwamba wekundu hao wa Anfeld
walimuahidi kuwa anaweza kuondoka katika klabu hiyo kwenye msimu huu wa
kiangazi, kama klabu hiyo ingeshindwa kutinga katika ligi ya mabingwa barani
ulaya.
“Niliwapa kwa heshima kila kitu
katika msimu uliopita. Sasa ninachohitaji ni Liverpool kuheshimu mkataba.”
Alisema Suarez katika mahojiano na magazeti hayo.
Luis Suarez, mshambuliaji wa kimataifa wa Uruguay ambaye anataka kuitema liverpool na kujiunga na klabu ya Asernal
Kulingana na mahojiano aliyoyafanya
Suarez na vyombo vya habari, Suarez alisema. “Mwaka uliopita nilikuwa na nafasi
ya kuondoka kuelekea katika klabu kubwa barani ulaya na nilibaki kwa mantiki ya
kwamba kama tutashindwa kuingia katika ligi ya mabingwa, msimu ujao
nitaruhusiwa kuondoka,”
Na tayari washika bunduki wa London,
Asernal the gunners, wameonesha nia ya kumtaka Suarez huku wakitangaza dau la zaidi
ya paun milioni 40 kama kishawishi cha kutaka kumnasa mchezaji huyo.
Liverpool, ambayo ilimaliza ikiwa ya
saba katika msimamo wa ligi kuu ya soka ya England msimu uliopita, tayari “wameichomolea”ofa
hiyo na kusisitiza kuwa licha ya Suarez kumaliza mkataba na timu hiyo
haiwalazimishi wao kumuuza mshambuliaji huyo wa kimataifa wa Uruguay.
Suarez, hakuweza kusafiri na kikosi
cha Liverpool katika mechi za mandalizi ya kivumbi cha ligi kuu ya soka ya
England, huko nchini Norway kutokana na kuwa na majeruhi ya mguu.
Akiwa na Liverpool, Suarez aliweza
kuifungia magoli 30 katika mechi 44 alizocheza katika msimu uliopita.
Tangu ajiunge na Liverpool akitokea
Ajax Amsterdam ya Uholanzi mnamo januari 2011 kwa dau la paun milioni 22.7,
alikwishafunga mabao 51 katika mechi 96, magoli 49 katika michezo 48 akiwa na
Ajax kwenye msimu kabla hajajiunga na Liverpool, akifunga magoli 35 katika
mechi 69 akiwa na kikosi cha taifa cha Uruguay.
Wakati hayo yakichomoza, bosi wa
timu ya soka ya Asernal, Aserne Wenger amekaa mkao wa kula tayari kabisa
kumsainisha mshambuliji huyo wa Liverpool, Luis Suarez, na kukiri kuwa mchakato
wa uhamisho wa wachezaji umekuwa mngumu tofauti na kawaida katika msimu huu.
