Mgomo mkubwa wa mabasi
ya abiria umeitikisa nchi na kuilazimisha serikali kusitisha kwa muda amri
yake ya kuwatoza asilimia tano wasafirishaji wanaozidisha uzito.
Idadi kubwa ya mabasi ya
abiria yanayofanya safari ndani na nje ya nchi yaligoma jumatatu hii katika
miji mingi ya nchi na kusababisha taharuki kubwa kwa abiria waliokuwa wamekata
tiketi kwa ajili ya safari zao.
Idadi kubwa ya abiria
walipata wakati mgumu katika kituo kikuu cha mabasi jijini Dar es Salaam,
Arusha na Moshi huku wasijue la kufanya.
Kulingana na taarifa
kutoka katika kituo kikuu cha mabasi yaendayo mikoani na nje ya nchi, wafanyakazi
na mawakala wa mabasi mengi walikuwa wamesimama wakidai kuwa wamekatazwa na
waajiri wao kuendelea na safari hadi watakapopewa maelekezo mengine.
Kufuatia hatua hiyo ya
mabasi kugoma, kamanda wa Kikosi cha Usalama Barabarani, Mohamed Mpinga,
akizungumza jijini Dare es salam, alidai kuwa mgomo huo haukuwa halali kwa
sababu wamiliki hao wa mabasi walikwisha kuingia mkataba na abiria kwa
kuwauzia tiketi za kusafiria, hivyo hawakupaswa kuwanyima haki yao ya
kusafiri.
Mpinga alisema kitendo
cha kutowasafirisha abiria hao ni sawa na kuvunja sheria.
Hata hivyo, baada ya
Kamanda huyo kukutana na viongozi wa Mamlaka ya Usafiri wa Nchi Kavu na
Majini (Sumatra) na Chama cha Wamiliki wa Mabasi (Taboa), aliwataka wamiliki
hao, hususan madereva kuwapeleka abiria hao kama tiketi zao zilivyokuwa
zinaelekeza, huku akiagiza Sumatra kuwakamata wale wote watakaopinga kufanya
hivyo na kuwanyang’anya leseni zao na hatua nyingine zichukuliwe dhidi yao.
Hata hivyo, amri hiyo
iliongeza hasira, na kuzuka mvutano mkubwa uliozidisha taharuki miongoni mwa
abiria.
Hali hiyo iliwafanya
viongozi hao kuwasiliana tena na mamlaka za juu, na ndipo ilipokubaliwa
kuyaruhusu mabasi yote kuondoka kwa masharti ya kutopimwa katika mizani.
Hata hivyo, mmoja wa
viongozi wa Taboa, Severine Ngallo, alisema makubaliano yaliyofikiwa ya
kusafirisha abiria yalikuwa ya muda, wakisubiri matokeo ya kikao ambacho
kingefanyika jana kwa kuwakutanisha na viongozi wa serikali.
“Nawashauri abiria
wasikate tiketi katika kipindi hiki kwani kuna uwezekano mgomo huo ukaendelea
tena leo na siku nyingine endapo madai yetu ya kuondolewa tozo hiyo
yatakataliwa,” alisema Ngallo.
Msemaji wa Wizara ya
Ujenzi, Martin Ntemo, alisema wizara imekubali kukutana na wasafirishaji hao,
lakini akakana kuwapo kwa makubaliano ya mabasi kupita katika mizani bila ya
kupimwa.
Nazo taarifa kutoka Jijini
Arusha, mabasi yote yaligoma kuondoka kituo kikubwa cha mabasi kwa zaidi ya
saa tatu, katika mwendelezo wa mgomo huo.
Hali hiyo ilimlazimu
Kamanda wa Polisi mkoani humo, Liberatus Sabasi, kuingilia kati
na kuwataka madereva hao kutumia busara ya kuendelea kuwasafirisha abiria wao
ambao walikuwa tayari wameshawakatia tiketi.
Alisema kuwa kila abiria
anapopanga safari yake ana kusudi lake, hivyo kuvunja safari kwa sababu za
mgomo si busara.
Madereva hao walikubali
kuendelea na safari kama kawaida majira ya saa mbili asubuhi huku wakidai
kuwa hawajui mahali pa kuwapeleka abiria hao kwani mgomo wao ni wa nchi
nzima.
|
